АСТАНА. 21 қаңтар. ҚазАқпарат /Руслан Ғаббасов/ — Өзге тілдерге құрметпен қарап, ана тіліміздің дәрежесін көтеру керек. Бұл туралы бүгін Мәдениет министрлігіннің өткен жылдағы қорытындысы мен 2011 жылға алға қойған мақсаттарына арналған алқа мәжілісінде Үкімет басшысы Кәрім Мәсімов мәлім етті.
«Өзге тілдерге құрметпен қарап, ана тіліміздің дәрежесін көтеру үшін еліміздің барлық азаматтары қазақ тілінде сөйлеуі керек»,-деп атап өтті Премьер-Министр.
Үкімет басшысы бұл тұрғыда нақты нәтижелерге қол жеткізу үшін жалпы ұлттық мәдениетіміз ғана емес, сонымен қатар еліміздің рухын көтеру үшін баршамыз бірдей атсалысуымыз қажет екенін қадап айтты.
«Халқымыз ел мәдениеті тілден басталады дейді. Өткен жылы тілдерді дамытудың жаңа мемлекеттік бағдарламасы жасалды. Биыл — бұл бағдарламаны іске асырудың алғашқы жылы. Осы орайда министрлік мемлекеттік тілді дамытуға айырықша мән беруі тиіс»,-деп түйіндеді сөзін К. Мәсімов.
/Казинформ/
