Алматы қаласындағы ҚР Президенті жанындағы стратегиялық зерттеулер жақында жарық көрген «Қазақ альманағы» альманағының тұсаукесер рәсімі өтті. Оған зиялы қауым өкілдері көптеп қатысты.
Ақпарат айдына қосылған интеллектуалды басылым «Қазақ альманағы» деп аталады. Альманах Мемлекеттік тілді дамыту қорының қолдауымен жарық көруде.
260 беттік жаңа басылымның өзегі қазақты дамытуға бағытталған тұжырымды, сүйекті материалдар болмақ. «Қазақ елінің тұрақтылығы мен мәңгілігі ең бірінші қазақ халқының жауапгершілігіне байланысты. Сондықтан қазақ мемлекет құраушы ұлтқа айналуы қажет. «Қазақ альманағының» көтеретін мәселелерінің негізгісі осы болмақ», – дейді басылым бас редакторы Берік Әбдіғалиев.
Альманахтың алғашқы санына мемлекет басшысының әр уақытта айтқан ұлқа қатысты парасатты пайымдары мен өзекті ойлары енген. Сонымен бірге Мұхтар Құл-Мұхаммед, Ақселеу Сейдімбек, Қойшығара Салғараұлы, Амангелді Айталы, Болатхан Тайжан, Әзімбай Ғали сынды өзге де ұлт зиялыларының материалдары және ұлт батыры Тоқтар Әубәкіровтің сұхбаты жарияланып отыр.
Тұсаукесер рәсіміне қатысқан зиялы қауым өкілдері басылымның бағыты мен мұратына қолдау көрсетіп, «Қазақ альманағының» мінберінен жиі пікір білдіретіндерін жеткізді.
«Қазақ альманағы» тек қазақтілді қауымның ғана емес, қазақ мүддесін көздеп жүрген орыстілді қауымның да пікір-талас алаңына айналуды көздейді» – дейді Бас редактор.
Альманахты әзірше тек «Меломан» дүкендер желісінен сатып алуға болады. Алдағы күндері басылым «Қазпошта» арқылы қалың оқырманның қолына жетпек.
Мемлекеттік тілді дамыту қорының баспасөз-қызметі тел:+ 7 (7172) 74-36-97