2014 жылғы 18 наурыз күні Астана қаласы № 8 орта мектебінде Мемлекеттік тілді дамыту қоры Астана қаласы білім басқармасы мен «Нұр Отан» ХДП «Жас Отан» Жастар қанаты және «Алдаспан» қоғамдық қорымен бірлесіп Ұлыстың Ұлы күні — Наурыз мерекесі қарсаңында «Батырлардан өнеге» тақырыбында 5-8 сынып оқушылары арасында өткен батырлар жырларын мәнерлеп оқу сайысының жеңімпаздарын марапаттау рәсімін өткізді.
Байқаудың мақсаты өскелең ұрпақты батырлар жырын терең меңгеріп, зерттеуге ынталандыру, жас буынды елжандылыққа, елдік санаға баулу, батырлар үлгісімен шәкірттерді көркем мінезге, батырлыққа, отансүйгіштікке тәрбиелеу.
Байқау талабы бойынша сайысқа Астана қаласының әр мектебінен бір оқушыдан қатысты. Оқушылар батыр бабаларымыз «Алпамыс батыр» мен «Қобыланды батыр» жырларынан үзіндіні жатқа айтумен қатар арнайы сахналық көрініс ретінде мәнерлеп оқыды.
Қазылар алқасы мүшелерінің шешімімен үздік нәтижеге №48 мектеп-лицейінің оқушысы Мықтыбек Әділ қол жеткізсе, екінші орынды №70 мектеп-лицейінің оқушысы Зияда Бақытқалиев пен №48 мектеп-лицейінің оқушысы Мырзағозы Абылайхан, ал үшінші орынды №71 мектеп-лицейінің 8 сынып оқушысы Диана Айтжанова мен №25 орта мектебінің оқушысы Балауса Абдуахит иеленді. Байқау жеңімпаздары Қордың арнайы сыйлықтарына ие болды.

Мемлекеттік тілді дамыту қорының
баспасөз қызметі