Үстіміздегі жылғы 26 қыркүйекте ҚР Мәдениет және ақпарат министрлігінің тапсырысы бойынша Мемлекеттік тілді дамыту қорының ұйымдастыруымен «Жаңа патриотизм – біздің көпұлтты және көпконфессиялы қоғамымыз табысының негізі» атты республикалық конференциясы өтті. Конференцияға қоғамдық және жастар ұйымдарының өкілдері, ғалымдар, қазақстандық жоғары оқу орындарының оқытушылары мен студенттері, Қор Камқоршылық және Сараптамалық кеңесінің мүшелері қатысты.
Конференцияны ҚазҰАУ әлеуметтік-гуманитарлық білім беру институтының директоры, саясаттану ғылымдарының докторы, профессор Сайын Борбасов жүргізді.
Конференцияда алғашқы баяндаманы Мемлекеттік тілді дамыту қорының директоры Азат Шәуеев жасады. Ол Президентіміз Н. Назарбаевтың Қазақстан халқына Жолдауындағы «Өз бойымызда және балаларымыздың бойында жаңа қазақстандық патриотизмді тәрбиелеуіміз керек. Бұл ең алдымен елге және оның игіліктеріне деген мақтаныш сезімін ұялатады.» — деген сөздерін келтіре отыра, патриотизм дегеніміз – бұл өз Отанына, халқына, оның тарихы мен мәдениетіне, еліне, жеріне деген сүйіспеншілігі екенін қоса айтты.
«Ана тілі» газеті бас редакторының бірінші орынбасары Нұрперзент Домбай өз сөзінде: «Патриотизм дегеніміз – бұл еңбекқорлық, өз еліне деген жанкүйерлік, өз іс-әрекетіне жауапкершілікпен қарау. Патриотизм рухы алдымен баланы мектеп табалдырығын аттаған кезінен бастап тәрбиелеу керектігіне сенетін мұғалімдердің ұстанымында бар. Патриотизм – барлық елдің өз Отанына деген сүйіспеншілігі. Патриот – өз мемлекетін сүйетін азамат» — деді.
Қор Сараптамалық кеңесінің мүшесі, профессор Айман Алдаш өз сөзін: «Біздің Президентіміздің сөздері ең алдымен аға буынға емес, сендерге, жас ұрпаққа арналады, сендерге сенім артады. Менің ойымша, патриотизмді тәрбиелеу – бұл біздің өскелең ұрпақта өз халқына деген адалдылықты, өз азаматтық борышы мен Отанын қорғаудағы конституциялық борышты өтеуге деген жоғары патриоттық сана сезімді қалыптастыруға арналған жүйелі де, мақсатты іс-әрекетіміз» — деп бастады.
Халықаралық «Қазақ тілі» Қоғамының жаупты хатшысы Нұрлан Асқаров өз сөзінде: «Патриоттық тәрбие недене басталады? Бір минут ойланып көрейікші: егер бізідің сана-сезімімізден Отан, азамат, міндет деген ұғымдар жоғалып кетсе, біздің өміріміз қандай болар еді. Отан жайлы толғанушылық – әр азаматтың өмірде орын табуында, азамат ретінде қалыптасуындағы ең маңызды сәттердің бірі. Тәрбиелеу үдерісінің ең маңызды бөлшегі – бұл патриотизмді тәрбилеу, өйткені, менің ойымша, бұл — тұлғаның әлеуметтік-азаматтық, рухани дамуының негізі болып табылады» — деді.
Қоғам қайраткері, Қор Қамқоршылық Кеңесінің мүшесі Асылы Осман өз сөзінде: «Мен өз халқыма ризамын, біздің Президентіміз жолдауында сөзінде: «Біз – көпұлтты қоғамбыз. Және де ұлтаралық қатынастар мәселесінде ешқандай қосарланған стандарттар болмауға тиіс. Мемлекетте бәрі де тең болуға тиіс. Этностық немесе басқа да белгілер бойынша жақсы немесе жаман деген болмауға тиіс. Қазақ тілі – біздің рухани негізіміз. Біздің міндетіміз – оны барлық салада белсенді пайдалана отырып дамыту», -деп айтқан еді. Менің ойымша, қазақ жерінде тұратын әрбір азамат мемлекеттік тілді үйреніп, қазақ тілінде сөйлеуге міндетті» — деп баса айтты.
Конференция соңында мемлекеттік тілдің рөлін арттыру арқылы жаңа қазақстандық патриотизімді қалыптастыру, жастарға патриоттық тәрбие беру жүйесін жетілдіру бойынша іс-қимыл жоспарының жобасына ұсынымдар жинақталды.
Конференция жұмысын қорыта келе, Қор директоры А. Шауеев конференция қатысушыларына алғыс білдіріп, оларға кәсіби және рухани табыстарға жетуге тілектестік білдірді.