ҚазАқпарат — Қазақстан Президенті қазақ тілі көп ұлтты мемлекеттің халқын қалай жақындастыра түсетінін айтты, деп хабарлайды «ҚазАқпарат» ХАА тілшісі.

«Мен 17 жасымда қазақ мектебін бітіріп, Украинаға жол тартып, одан кейін өздеріңіз білетіндей Теміртаудың металлургиялық комбинатына келдім. Орыс тілді ортада 20 жылдан астам уақыт жүргеннен кейін тілді (қазақ тілін — авт.) таза ұмытып қалдым. Сексенінші жылдардың соңында Қарағанды облысынан Алматыға Орталық комитеттің хатшысы болып келдім. Міне, осы кезде қазақ тілінде сөйлеуім керек болды. Осы кезде маған қазақ тілінде шығатын «Социалистік Қазақстан» газетін оқи бер деп кеңес берді. Оңай болған жоқ. Оқып, оқып ақыры тілдік қорымды ұлғайтып алдым. Бәрі де адам өзін-өзі қалай жігерлендіреді — соған байланысты», — дейді отандық БАҚ өкілдерімен кездесу барысында Қазақстан Президенті.

Нұрсұлтан Назарбаев өз сөзінде мемлекеттік қызметте жұмыс атқару үшін мемлекеттік тілді білу міндетті екенін атап өтті. «Бірақ, мемлекеттік қызметтен бөлек, басқа да жұмыстар жетерлік. Ал мемлекеттік қызметке ұмтылған адам тілді меңгеру керек. Қазақстандағы барлық этникалық топтардың қазақ тілін білуі — халықты ұйыстыра түседі. Лондонға немесе Вашингтонға барып, ағылшын тілінде сөйлесең — сен жұртпен тез тіл табысасың. Ал Мәскеуде орыс тілін меңгермей тұрып, қалай жұмыс істейсің? Мүмкін емес. Немесе Германияға барып, неміс тілін білмей жұмыс істеу мүмкін емес қой?.. Тіл бәрімізді жақындастырады», — дейді Мемлекет басшысы. Нұрсұлтан Назарбаев өз сөзінде латын әліпбиін енгізудің түпкі мақсаты туралы сөз қозғады.

«Бүкіл Америка Құрама Штаттары — мигранттар елі. Бүкіл мемлекеттен келген адамдарды ол мемлекетте ағылшын тілі бір ұлт ретінде жақындастырады. Сондықтан, тілді сондай рөлге жеткізгім келеді. Бұл жеке бастың мақсаты емес. Мақсат — біздің көпұлтты мемлекетіміздің халқын бірегейлігін қалыптастыру», — деп түйді Қазақстан Президенті.

Толығырақ: http://www.inform.kz/kz/nazarbaev-memlekettik-kyzmette-enbek-etu-ushin-memlekettik-tildi-biluge-tura-keledi_a3104701