2017 жылғы 7 қараша күні Астанадағы «Назарбаев орталығында» Қазақстан Республикасының Тұңғыш Президенті – Елбасының Қоры және Мемлекеттік тілді дамыту қорының ұйымдастыруымен «Жаңа әліпби — жаңғыру жолы» атты дөңгелек үстел өтті.
Іс-шараға қоғам қайраткерлері, депутаттар, лингвист-ғалымдар, филологтар, саясаткерлер, белгілі журналистер қатысты.
Қазақстан Республикасының Президенті Нұрсұлтан Назарбаев қазақ әліпбиінің кириллицадан латын әліпбиіне көшуі туралы жарлыққа қол қойған болатын. Елбасы латын қарпіне көшу күрделі үдеріс екенін, сондай-ақ оның мақсаты тілімізді дамыту және оны әлемдік ақпараттық кеңістікке шығару үшін жағдай жасау болып табылатынын атап өтті.
Дөңгелек үстелде сөз алған ҚР Тұңғыш Президенті – Елбасы Қорының атқарушы директорының орынбасары Сұлтан Айтжанов: «Ең алдымен Елбасымыз айтқандай «Ұлттық кодымызды» сақтау үшін және шетелде тұрып жатқан қандастарымызбен қарым-қатынасымызды жақсарту жолында маңызды шешім. Екіншіден, интернеттің кеңінен қолданылуы, халықаралық деңгейдегі сапа, талап тұрғысынан алғанда латын әліпбиі жаңа технологияларға жол ашары анық»-деді.
Дөңгелек үстел барысында жаңа әліпби авторларының бірі Ш.Шаяхметов атындағы Республикалық үйлестіру-әдістемелік тіл дамыту орталығының директоры Ербол Тлешов өз баяндамасында: «Латын графикасына көшу тарихи оқиға және мемлекеттік бәсекеге қәбілетін арттыру, сонымен қатар ұлттық бірегейлікті сақтаудың маңызы зор» — екенін айрықша атап өтті.
ҚР Парламенті Мәжілісінің депутаттары Бақытбек Смағұл және Геннадий Шиповских, ардагер журналист Сүлеймен Мәмет және басқа да іс-шараға қатысушылар талқылау барысында өз ойларын білдіріп, қазақ тілі әліпбиінің латын графикасына көшуінің маңызды үдеріс екеніне ерекше тоқталып өтті.
Жиынды Мемлекеттік тілді дамыту қорының директоры Азат Шауеев: «Алдағы кезең ұсынылған нұсқаға қазақ тілінің табиғаты мен заңдылықтары тұрғысынан, орфографиялық, орфоэпиялық ережелеріне икемділігі жағынан талдау, талқылау жүргізілетін кезең болмақ және бүгінгі түскен пікірлер мен ұсыныстар Ұлттық комиссияға жолданатын болады»- деп қорытындылады.
