Қазақстан халқы Ассамблеясының 20 жылдық мерейтойына арналған ХХІІ сессиясы еліміздің ертеңі ерек екенін саралап берді. Онда тағдырын өз қолына алған қазақстандықтардың қандай қиыншылық туындаса да бірлік пен татулықтың арқасында бүкіл әлем құрметтейтін бүгінгі және келешек ұрпақ үшін жасалған зор биікке жеткеніміз баян етіліп, көп ұлтты халқымыздың біртұтас, топтасқан халыққа біріге алғанымыз – артықшылығымыз екендігі сенім туғызады.
Біздің күшіміз осында. Соның бір көрінісі ретінде Елбасы қазақ тілін үйреніп жүргендерге алғыс білдіре келіп, мемлекеттік тілдің дамуы әрқашанда маңызды екенін айтты.
Бұл орайда барша ұлт өкілін бауырына басқан тұғыры биік еліміз осы татулық пен келісімнің арқасында әлі талай асқаралы белестерді бағындырары сөзсіз. Тек сол мақсатқа жету тілегі мен жүрегі бір берекелі халықтың еншісінде дейміз. Соның бір жарқын мысалы ретінде «Мемлекеттік тілді жоғары құрметтеу – сол тілді жан құштарлығымен үйренуден басталады» деген қағиданы Астана қаласы ІІД «Сарыарқа» аудандық ІІБ полицейі Николай Жгун де берік ұстаныпты.
Мемлекеттік тілді жетік білуді өмірдегі үлкен жетістік деп түсінетін Николай Ақмола облысы, Қорғалжын ауданында оқушы болып жүрген кезінде-ақ қазақтың төл ақыны Абайдың шығармаларын түпнұсқада оқыған екен. Соның арқасында қазақ халқының дәстүрі мен салтын, мәдениетін кеңінен таныған. Енді, міне, ол сегіз жылдан астам уақыт бойы құқық қорғау органдарында қызмет етіп келеді. Осы жылдары көп нәрсе өзгерді. Николай шаңырақ көтерді. Интернационалды отбасы атанды. Қазақ тілін қазақтан артық білудің арқасында шығар, оның жұбайы да қазақтың қызы – Жанна. Ол да құқық қорғау органы қатарында абыройлы еңбек етіп, жол-патрульдік полиция штабының аға инспекторы, полиция капитаны. Олардың Ислам атты 6 жасар ұлы, Илана атты 3 жасар қызы және 9 айлық Имран атты тағы бір ұлдары бар. Жоғарыда айтылғандай, Ислам мен Илана қазақ балабақшасында тәрбиеленуде. Қазақ тілін меңгеруді әрбір қазақстандықтың қасиетті парызы деп санағандықтан, балаларын бүлдіршін кезінен мемлекеттік тілге баулығанды жөн көреді. Тілді құрмет тұтумен қатар, халқымыздың дәстүрін жоғары бағалайды.
– Қоғаммен араласуда мемлекеттік тілді жетік білген жөн. Өйткені, қоғамдық тәртіпті қорғау – жауапты іс. Көмек сұрап талай азаматтар жолығып жатады. Мен олармен қазақ тілінде тілдескенімде, олардың кейбіреулері қазақ тілін қайдан білетінімді сұрайды. Мен Қазақстан азаматымын, өз елімнің тілін білмесем ұят емес пе деп жауап қайтарамын», дейді Николай. Иә, тіл білгеннің өрісі кең деген осы.
Александр ТАСБОЛАТОВ,
«Егемен Қазақстан».
Ақпарат көзі: http://egemen.kz/2015/05/05/60822
