Бүгін Астанада мемлекеттік тілді тегін оқытатын «Qazaqsha-online» Интернет-порталының жасалуына арналған баспасөз конференциясы өтті. Жоба Мемлекеттік тілді дамыту Қорының бастамасы бойынша «Қазақстан -2050» Стратегиясында айтылған міндеттерді орындау мақсатында ҚР Тұңғыш Президенті — Елбасының Қоры мен «Samsung Electronics Kazakhstan and Central Asia» Компаниясының қолдауымен жүзеге асырылады.
Іс-шараға ҚР Тұңғыш Президенті-Елбасы Қорының өкілі Серік Бұлхайыров, «Samsung Electronics Kazakhstan and Central Asia» Компаниясының президенті Сын Сик Чой, Мәдениет және ақпарат министрлігі Тіл комитеті төрағасының орынбасары Шерубай Құрманбайұлы және Мемлекеттік тілді дамыту Қорының директоры Азат Шауеев қатысты.
Баспасөз-конференциясында Қор директоры Азат Шауеев Елбасымыз Н.Ә.Назарбаев «Қазақстан -2050» стратегиясында: «Қазақ тілі – біздің рухани негізіміз. Біздің міндетіміз – оны барлық салада белсенді пайдалана отырып дамыту. Біз ұрпақтарымызға бабаларымыздың сандаған буынының тәжірибесінен өтіп, біздің де үйлесімді үлесімізбен толыға түсетін қазіргі тілді мұраға қалдыруға тиіспіз. Бұл – өзін қадірлейтін әрбір адам дербес шешуге тиіс міндет», – деп нақты көрсеткенін, ал қазіргі таңда интернет жүйесінде қолжетімді (тегін) онлайн курс жоқ екендігін атап өтті.
Сондықтан да біз тілдерді оқытудың халықаралық және отандық іс-тәжірибесінің тиімді тұстарын зерттеп-зерделеп, сараптай келе қазақ тілін оқытудың онлайн курсын әзірлеуді қолға алдық, көпшіліктің мемлекеттік тілді жаппай үйренуіне ақпараттық технологиялар қажетті жағдай туғызбақ – деді.
Онлайн курс тәулік бойы жұмыс істейтін болады. Оқу бағдарламасы қазақ тілін тиімді әдіс-тәсілдер арқылы жедел меңгеруге және тіл үйренушілерге алынған білік-дағдыларын күнделікті өмірде еркін пайдалана алуға мүмкіндік береді. Бағдарламада тілдік құзыреттің барлық түрі: сөйлесім, айтылым, оқылым, жазылым әрекеттері толық қамтылатын болады. Жобада үйренуге тиімді оқу материалдары мен ақпараттық жүйедегі жаңаша мультимедиялық мүмкіндіктер (графикалық суреттер мен анимация түрлері, аудио және бейне материалдар) үйлестіре берілмек.
«Бұл жобаның бүгінгі таңдағы өзектілігі айқын. Мемлекеттік тілді онлайн режимде оқыту қажеттілігінің өзі тілге деген сұраныстың күннен-күнге артып келе жатқандығымен түсіндіріледі, жүйе тіл үйренушілерге өз уақытын тиімді де жоспарлы пайдалануына мүмкіндік бермек», — деп атап өтті Шерубай Құрманбайұлы.
Баспасөз-конференциясы барысында «Мемлекеттік тілді дамыту» Қоры және «Samsung Electronics Kazakhstan and Central Asia» Компаниясы өзара ынтымақтастық туралы Меморандумға қол қойды.
«Samsung Electronics Kazakhstan and Central Asia» Компаниясының президенті Сын Сик Чой: «Компания мемлекеттік тілді дамыту мен оның қолдану аясын кеңейтуге зор көңіл бөлуде. Бүгінде Самсунгтың барлық құрылғылары қазақтілді интерфейспен жабдықталып, көптеген қосымшалар мемлекеттік тілде қолданылады. Бұл жоба Samsung Electronics Kazakhstan компаниясының жалпы құндылықтарды құру бағдарламасы аясында жүзеге асып отыр. Жыл сайын Қазақстан аумағында Компания табысының 1 пайызы осы секілді әлеуметтік бағдарламаларға бөлінеді. Мемлекеттік тілді қолдау осы бағдарламадағы негізгі басымдықтардың бірі» – деп атап өтті.
