«Қазақстан халқы ассамблеясының қоры» қоғамдық қорының «Тілдарын» тілдерді оқыту инновациялық технологияларының әдістемелік орталығының ұйымдастыруымен «Ықпалдастық: тіл, мәдениет, салт-дәстүрлер» атты Халықаралық жобаның жабылуы, жас ғалымдар мен магистранттарға арналған ғылыми және әлеуметтік маңызы бар жобалардың белсенді қатысушыларды марапаттау рәсімі болып өтті.

Осы жылдың маусым айы мен қыркүйек айының ара­сында Кемер (Түркия) қаласында өткен жоба бағдар­ла­масында жаздық тіл мектебі: «Тілдарын» әдістемесі бойынша жеделдетіп қазақ тілін оқыту және Дмитрий Петровтың авторлық әдістемесі бойынша ағылшын тілін оқыту курс­тары, жаздық көшбасшылық мектеп: жастардың және басқарушылардың көшбасшылық әлеуетін ашуға бағыт­талған тренингтер, жаздық ғылыми-зерттеу академиясы: бірнеше бағыт бойынша жас ғалымдар мен магистранттарға ар­налған ғылыми және әлеуеметтік маңызы бар жобалар байқауы ұйымдастырылған болатын. Сондай-ақ жоба аясында «Түркітану және мәдениетаралық диалог» атты сараптамалық симпозиум, «Болон процесі — тәжірибе мен болашақ» атты халықаралық конференция, «Тіл — азаматтық қоғамды біріктіруші фактор» атты халықаралық форум, «Инновациялық технологиялар арқылы тілдерді жеделдетіп оқыту» тақырыбында халықаралық семинар, жобаның мәдениеттік құрылымы бойынша қазақстандық және шетел­дік кинематографистердің тарихи және өмірбаяндық де­ректі фильмдері көрсетіліп, халықаралық қауымдастық сый­лығының лауреаты Серікжан Есжановтың «Мәдениет арқылы өмір» көр­месі, Ресей жазушысы, «Мәдениет» арнасының тележүргізушісі Олег Шишкинмен кездесу өткізілген болатын. Өз елімізден, Түр­кия, Ресей, Чехия се­кілді алыс-жақын шетелдерден 800-ден астам қатысушылар тіркелген ауқымды жоба Қазақстан тарапынан шетелде алғашқы рет ұйымдастырылып отырған білім жобасы бо­луы­мен де маңызды.
Ұйымдастырушылардың айтуынша, жоба өзіне мем­ле­кеттік тілдің функционалдық белсенділігін кеңейту, этнос­аралық ке­лісімді нығайту, қазақстандық патриоттық, отан­сүйгіштік сезімді жетілдіруді мақсат тұта отырып, то­леранттылық — қоғамдық ке­лісімнің қазақстандық моделін халықаралық аренада насихаттауды, түркі әлемінің мәдени мұрасын және тарихын зерттеуді, «Тіл­дарын» тілдерді жеделдетіп оқытудың инновациялық әдістемесін кеңірек таратуды міндеттейді.
Әлемдік есімі бар ғалымдар, мемлекет және қоғам қай­рат­керлері этномәдени бірлестіктер өкілдері, мемлекеттік мекемелер қызметкерлері, сонымен қатар жоғары оқу орындары студенттері, оқушылар, үкіметтік емес жастар ұйым­дарының өкілдері, блог­герлер мен журналистер қа­тысқан «Ықпалдастық: тіл, мәдениет, салт-дәстүрлер» жобасын «Самұрық-Қазына» Ұлттық әл-ауқат қоры» АҚ, Қазақстанның Даму Банкі АҚ қаржыландырған болатын.

Ерлан ТӨСБАЙҰЛЫ
Астана

«Айқын» газеті 26.10.12.